TADIST YETTWANEƐLEN

-S nnefxa nessawal-a-m yelli-tneɣ, ɛzizeḍ, ɣlayeḍ teẓriḍ. Ṛazan, yemma-m mi kem-id-tesɛa, deg yigenwan teṭṭef tasga. Daxel n tattalt i kem-id-teǧǧa, imeṭṭi-m inǧer-d targa. Ɣer-neɣ teqqur tara. Neffud aṭas i neswa, s wudem unṣib tezzha lḥara mi teqqleḍ d yelli-tneɣ, xas ur telliḍ d tacriḥ-nneɣ, suref-aɣ, neẓra qessiḥet tyita, ɣer daxel-im teɣza ccama…

Yenneqlab wudem-is, tɣawel tejbed ifassen-is, tsekna i temgarḍt-is, tsaḥ d lehwa n yimeṭṭi. Irebbi-s icuba tamda. Nna Faziya terfed-itt-id deg tɣesmart-is, tenna-as: « Rfed aqerru-m ur ttsetḥi ara, sfeḍ imeṭṭi-m, ɣbu leḥzen-im ur tuklaleḍ ara, seḥḍer leɛqel-im mmeslay d yiman-im, nced-d ula d leḥzen-im, wzen-itent akk deg lmizan, siff-itent deg uɣerbal, deg tasilt niwel-d kan ayen akken ilhan. Ayen n dir yeǧǧa-t lawan, deɛwessu i wid yenɣan yeqqden tudert n yemma-m s akal, ɣawlen mi tt-ɛebban, d isem n tgujilt i am-gan, fesren-kem weḥd-m ad tqableḍ isɣan, nutni lebɛid ttaḍṣan ».

– Ah yemma? Zziɣ, rɣiɣ, ḥdaqreɣ ɣer daxel acḥal cewḍeɣ. D awezɣi, ugiɣ ad amneɣ, mennaɣ lukan ɛuẓgeɣ yir lexbar ur as-selleɣ, di zzhu kan ad idireɣ. Imawlan-iw d kunwi yiwen ur iyi-ittbeddil tikti, tegrem-iyi irebbi, tsefḍem-iyi imeṭṭi, teggullem ur ddiɣ ḥafi. Isem, tgam-iyi-t deg tmetti, s tayri tessawalem-iyi a yelli. Taɛebbuḍt anda xbabḍeɣ udem-is bɣiɣ ad t-ẓreɣ. Aẓekka-s ad t-id-neqleɣ sdat n uxxam ad as-ɣzeɣ, yal ṣṣbeḥ ad t-id-ẓureɣ. Tadyant-is s telqayt i bɣiɣ ad as-sleɣ…